شعر: فريــد زمكحـل
نفسي أشوف الحلم حقيقة
نفسي أشوفه بأي طريقة
وأقدر أعيشه في كل دقيقة
واللا أعيشه معاك لدقيقة
نفسي ونفسي وحاجات من نفسي
تقرَّب منِّى وتسمع همسي
وأنا بهرب بيك من خوفي ويأسي
وبناديك بحبيبي وأهو ده من نفسي
وسامحني… واغفر لخيالي
لو كان اتعدَّى حدوده معاك
إن كان لخيالي حدود ويَّاك
يمكن تعرف إنَّك على بالي
وإن ماخطرتش يوم على بالك
مش راح أعاتبك وأرضى بحالي
ويبقى سؤالي وصلُه جوابك
ودي آخر مرة أقول بهواك
وحعلِّم قلبي إزاي ينساك
