بقلم : سناء سراج
الحلزونة ياما الحلزونة
فاكرها..
انت.. ايوه.. انت
متضحكش عليا
انا اول مرة اكتب بالعامية.
يمكن تلاقي في كلامي معنى
وتشوف بين السطور حاجة تايهة
انا فجأه لقتني
لوحدي بس للأسف
مش دي المفاجأة
اصل معرفتش اكون بالف وش ولون
عمري ما اتعودت على الضحكة الصفرا
اللي ليها ميت معنى..
بيقولوا عليا صعبة
ميعرفوش اني زي القشة
وللحب في قلبي مكان كبير
والحنية مستوطنة فيا
بس يمكن كتر الأسية
خلتني جامدة شوية ..
قلبي الموجوع.. قلبي المفجوع..
اللي بيبكي ديمآ من غير دموع..
وشوش بتتلون وقلوب بتتألم..
وناس للأسف مش ناس مهما كنت صافي..
والنقاء فيك موجود
هتقابل اللي مايعرفوش معنى
الوفا وطيبة القلوب..
كتير بنسكت
أصل الكلام مبقاش يقول
بس ساعات الصمت ينطق
جوا العيون..
وعجبي.. عجبي
على الندل لما يبرر ليه يخون
والأمانة في حياته ملهاش وجود
والعيش والملح ملهومش عنده حقوق
اصل مجموعة منزلش في التنسيق
وفجأة لقيتني لوحدي
بس مش دي المفاجأة
اصل معرفتش اكون بالف وش ولون
وعمري ما اتعودت على الضحكة الصفرا
واللي ليها ميت لون ولون..
معرفتش اكون بالف وش ولون..