شعر: صباح غريب
هوّ راسم لي الفضيلة
بين ضلوعة قلوب كتيرة
كلّ يوم بيحب واحدة
والماما بعنيها شاهدة
هيّ فرحانه بجماله
والبنات دايبة ف وصاله
فاكر انّ دي الرجولة
لِبْس غالي وماركة فورة
عاش بيحلم بالوزارة
بسّ مستني الإشارة
الوزارة دي أيه ياحيلة ؟!
دا أنت أفكارك عليلة
ليلة سالي ويوم دليلة
تجري دايما ع الرزيلة
والرزيلة جوّا دمّك
هيّ حلمك … كلّ همّك
ويّا صُحبة من العقارب
كلهم عايمين في قارب
جوّا يومة وذكرياته
كلّ حلمك في الأزيّة
والشَبَك يصطاد صبيّة
بكرة حتكون جاية جاية
ليّه بتضحك ع الولايا ؟
كلّ يوم تحكي حكاية
لمّا توصل للنهاية
تبقي واحدة من الضحايا
في البنات عامل دراسة
مين كيوتة ومين شراسة
يوم متغرق في النجاسة
يبقي مجدك ده دناسة
اكتب الموّال بأيدك
بكرة قلبك راح يزيدك
سهم كيوبيد لو يصيبك
يومها تنزف من وريدك
والندم حيكون رصيدك
جمع الأوراق في حضنك
راح تقابل بكرة ربك
ينتقم من كل ذنبك
أختياري كان خطيئة
أو عتامة في الطريقة
لمّا فكرت انّي احبك
وانّ طيبة جوّا قلبك
أصلي عايشة بالأمانة
وانت مدرسة الخيانة
لما علّيتك قصادي
رحت برضو للنتانة
بكرة حتدوق المهانة
دا انت عايش باستهانة
الخيانة مش قراري
ليه تسكّنها في داري
خدها وامشي من حياتي
بكره حامسح ذكرياتي
يلا ووراك الف داهية
يا ابو وش وضحكة ساهية
كان راسم عالخد طيبة
هي كانت والله خيبة
أمشي من غير السلامة
بكرة تحصد النّدامة
يلا و ابعد عن حياتي
مش حجيبك في حكاياتي
دا انت أسوأ ما ف حياتي
