سيبني أعيش

شعر: صباح غريب

أنت فاهم
يعني أيه متلزميش ؟!
يعني أيه أنك تقولّي :
إنّ من غيري تعيش
إنّ تدبح حلم حُبّك
جوّا قلبى خنتني ما رحمتنيش
إن تخنق بسمتى جوّا الشّفايف
تنتحر وماتتنسيش
جاى تقولى ف قصتك
ماتصدّقيش
وإنّها لحظة وكان فيها اندفاع
ماتكبّاريش
وإنّ قَصدَك غير كده
مافهمتنيش
وانّ جيت في مرة تحطّنى
في رفوف دولاب الذكريات
وسط البنات
ما تحطنيش
وعاوزني أصدّق كدبتك يعنى واعيش ؟!
إزاي يكون ؟!
إزاي يكون فى محبتك
ماعرفتنيش
لمّا ربّوك على القيامة
ربّوا طبعي ع الكرامة
لمّا جيت لي وقلت لي :
ما تلزميش
ومشيت وتاهت خطوتى
تاهت معايا سكتي
رغم الطريق مابينحنيش
جاي لي تقولي :
لمّتك وسط البنات
فاكرها ياك مبتنسانيش
جاي تقولى :
بسمتك وخفتك
وإنّ من بعدي
ما عاد عارف تعيش
جاى تقول : إنّ الفراق
وجع القلوب
وإنّ كام ذكرى
في بعادك راح تعيش
وإنّ حُبّك جوّا قلبك
نار بتحرق
حرّها ما ينتهيش
عاوزة أقولك كلمتين
مش حقول الوقت فات
واللي باقى فى سكتى
يا دوب شوية ذكريات
لا …. حقولك إنّى عارفة
إنّ حبّك جوّا قلبي
جوّا قلبك
كان قدرلازم يعيش
وإنّ عارفة إنّ حُبّك دا حقيقة
عمري ماصدّقت كلمة
من كلامهم أو ماليش
بس أنت في النهاية
بعتني …. ما فهمتنيش
ضِحكنا في الصحبة
كان حبّة هزار
انتهى وياي بصدمه ماتنتهيش
بس مش قلبي لوحديه اتقتل
لا … مشاعري كلها صبحت مافيش
أي ذرة من كرامتي كان تعيش ؟!
لما جيتنى ف وقفتى وسط البنات
قلت لازم تبعدي
ما تلزميش
أيه يفيد تاني الندم
ولا السكات ؟!
متسيبنى اعيش !!