شعر: صباح غريب
مع قلبي باتمرجح
من فوق سنين الخوف
عطشان كتير للفرح
كغزاله في الغابه
متحاوطه بديابه
ماسابوا لي غير العضم
والجلد تجعيدُه
مطبوع عليه الظلم
وانا عايشه متصابه
روحي بقت أدغال مسكونه بالأندال
واللي خرج شايل جلابيته مليانه
بالذكريات بينهم
والفرحه ساكنه الخد
والقلب كان مسرح
منصوب عليه العرض
كان نفسي ادوق فرحه
وتكون يادوب ع القد
فتلوّن الأزهار
من فوق شجر دبلان
روحي بقت دخان
بيعتمّ الصوره
مابقتش اخاف م الموت
يمكن ألاقي هناك
ف الآخره بني آدمين
الناس هنا شياطين
متلونين بالخلق
أنا روحي رايحه هناك
باصه من الشباك
على جنه فيها براح
ولحظتين أفراح
أتدارى ف عروقهم
أنا جلدي شاب ع الأرض
مستني يوم العرض
