القاهره / ناصر سليمان.
جابوه من بيته بالكلابشات!
القبض على رئيس شركة مياه الشرب بالقاهرة الكبرى، المهندس إسماعيل عبد ربه عبد الباقي، ومعاه رجل أعمال أجنبي و10 متهمين تانيين في واحدة من أكبر قضايا الفساد اللي اتكشفت النهاردة.قوة من الرقابة الإدارية اتحركت النهاردة الصبح وقبضت على المهندس إسماعيل من بيته، واقتادته مباشرة لمكتبه في مقر الشركة عشان يفحصوا الملفات والمستندات، وفي نفس التوقيت تم القبض على رجل أعمال أجنبي من بيته هو كمان لارتباطه بنفس القضية. التحقيقات بتدور حوالين شبهات فساد ومخالفات مالية وإدارية في عقود ومناقصات قديمة، بترجع للفترة اللي كان فيها رئيس الشركة الحالي ماسك منصب مدير المشروعات ونائب رئيس الشركة، وبالتحديد في عمليات إسناد بالأمر المباشر.واللعب كله كان في عقود توريد “طلمبات المياه”، ودي المضخات والمواتير العملاقة اللي بتركب في محطات المية عشان تسحب المية من النيل وتضخها في الشبكات لحد ما توصل بيوتنا. دي معدات مستوردة بتكلف ملايين في المناقصات، وهنا كان رجل الأعمال الأجنبي هو الطرف التاني بصفته صاحب واحدة من الشركات المتخصصة في استيراد وتوريد الطلمبات والمعدات الهندسية للقطاع، واللي جهات التحقيق متحفظة حاليًا على اسمه واسم شركته لحين انتهاء التحقيقات السرية.وفي أحدث تطورات القضية، عدد المتهمين المضبوطين وصل لـ 12 متهم (رئيس الشركة و11 آخرين)، وجهات التحقيق قررت حبسهم 45 يومًا على ذمة التحقيقات، وفي نفس الوقت الشركة القابضة كلفت المهندس محمد صلاح، رئيس شركة مياه الجيزة، بتسيير أعمال شركة مياه القاهرة مؤقتًا.
