شعر: صباح غريب
اقفل بيبان الأسئلة
شدّ الغطا على كتفك العريان
واطلب لنا فنجان دفى
م الاشتريته زمان
معرفش ليه
الليله تكتكه الساعات م البرد
عملت لقلبي صداع
والوقت ضاع
لما اترعش عقرب سنينا
في برد طوبه
دور هناك ع الدفى
مش لاقي حد
كل اللي راح الإمتحان مرجعش ليه؟!
وقته رماه في دوَامات الاسئله
رغم إنه سهل
كل الي راح الإمتحان خسران
فبلاش نفتش عن جواب ملهوش وجود
واخطف قوام برد السنين
خبيها في حضن الدفى
واشرب سكات
فماعدش ليك فمتو مكان
جوّا معادلة الأختيار
فاختار لقلبك م الهوا
أو تياراته ستار
معرفش ليه
كل اللي راح الإمتحان مرجعش
لكن أكيد بقفل بيبان الأسئلة
وبشدّ فوق كتفي الغطا
واطلب لقلبي م الدفى فنجان
م اللي اشتريته زمان
