شعر: جون كرم
مين أنتي ومين بتكوني
لما الدموع تكر عا جفوني
ولما بيغفى الحلم بعيوني
بروح إتعمشق على الغيمات
فتش عليكي بغربة شجوني
وطلعت إسأل عنك النجمات
يا نجوم عالمحبوب دلوني
وعنك رحت إسأل الحوريات
وين بتكوني يا مجنوني
ناديت وينك جاوبو النسمات
وصارت ظنوني تشك بظنوني
مين إنتي يا بنت بالذات
وليش فيي دوم مسكوني
رحتي وتركتيني مع الآهات
وحتى ما تقوى ثورة جنوني
وقبل ما تقولي حبيبك مات
مين إنتي ومين بتكوني
