شعر: صباح غريب
اجمع كدا حبّة حاجات
كلمة معاك أو كلمتين
أو نظرة حلوة
م السّكات
اجمع كدا فرحة عيون
فيها الأمل فيها المنى
و فيها حتّي كتير
آهات
اجمع لي عَبرة تتحبس
جوّا الحلوق
نسمع لها وقت الفراق
فيها شوية
حشرجات
اجمع لي ضحكة في الكلام
لمّا يجدّدها اللقى
فيها كتير
م الأمنيات
اجمع لي لمسة تحسّها رغم البعاد
وبرغم أنّك مش هنا
وبرغم أنّي مش هناك
لمسة و فيها كتير
حاجات
اجمع ورودك كلّها
واقطفها فى غير الميعاد
خايف لنصبر ع الورود
لتموت في أوقات الميلاد
اجمعها ومعاها الأمل
وراعيها جوّه
الزّهريات
خوفي الشّديد لمّا القدر
ياخدنا في سكّة سفر
لا فيها سكّة للرجوع
ولا احتمال للأمنيات
اجمع كدا كلّ اللي فات
واعمل لي نسخة منّها
حُطّه في صندوق واقفله
واكتب عليه
الذكريات
وإيّاك تقول
أنّ في بعادي راح تموت
قلبي الضّعيف لا يحتمل
كتر الآهات
اجمع كتير من الذّكريات
يمكن نقضّي عمرنا
ونعيش سوا رغم البعاد
ويا شوية
ذكريات