شعر: صباح غريب
اكتب حروفك هنا
ع القلب والشّرايين
دى سطور كتير إنّما
مين اللي يقدر مين ؟
اكتب : بحبّك أنا
علي جدار القلب
انقشها ويّا الهنا
زيّنها حبّ في حبّ
يمكن تنول المنى
لمّا يرقّ القلب
اكتب حروفك هنا
ع القلب والشّرايين
حرفين تلاتة إنّما
الوعد ملو العين
اكتب راح اسكن هنا
جوّا وريد العقل
أفرشها فرح وأمل
نوّرها حبّ وسعد
يمكن ف نور العقل
أقدر أشوف الوعد
وف حتّه جنب العقل
هات الكلام هاته
خزن كلامك هنا
عيّشني ف سكاته
لمّا الكلام ينطق
عيّشني في آهاته
اكتب حروفك هنا
ع القلب والشّرايين
حرفين تلاتة إنّما
الكلمتين هاديين
أمّا علي أيدي
اكتب حروف تانيين
دا الدّم في وريدي
شايل أمل وحنين
شايل أمل حبيبين
ع الحبّ متعاهدين
اكتب حروفك هنا
اكتب حروفك فين
بسّ المهمّ يكون
الكلمتين صادقين