شعر : جون كرم
شو عم تعملي يا روح فيي
بجسمي وعم بتستقوي عليي
إفتكرتك رح تزيديني أماني
إعتبرتك من عند الله هديي
شو عم تعملي بجسمي الأناني
شو عم تعملي بجسم الأذيي
شو عم تعملي بجوهر كياني
بيكفي تعزبي جسمي الضحيي
كياني من وجودك عم يعاني
من الصبح وطلوعو للعشيي
شو همك تفضحيني بعنفواني
تا حتى تقصري درب المنيي
وقبل ما نرحل على كون تاني
تعي نحل الخلاف بصدق نيي
يا روحي الجسم لوجودك ضماني
وما بتكوني بدونو سرمديي
عودي للوجود الأولاني
إرجعي لربك يا هالروح النقيي
زمانك ما بيقرب عا زماني
ورغم ماعالأرض جينا سويي
إنتي خالدي والجسم فاني
وإنتي بنت الله والطهارة
وأنا بأرض الفنا إبن الخطيي