شعر: جون كرم
وعيت الصبح عا صوت عصفورة
وأوركسترا من جوقة حساسين
وألحان بالإبداع ممهورة
المسرح جنينة وغصن شجرة تين
وورود عند الفجر مسرورة
عم ترقص بعرس اللحن تخمين
ما بين حفة وجل والجورة
للحلى عم تفتح دكاكين
والشمس خلف الغيم مستورة
بشعاعها عم ترسم تلاوين
وغيمة وراها كتير مقهورة
تبكي الدموع علا شجر شربين
هالكون يمكن كان أسطورة
قبل البشر من أول التكوين
ونحنا بذاكرة الدني صورة
وأرقام عم نمرق عا شاشة دهر
وبين الحزن بين الفرح والقهر
بأول طفولة لنهاية عمر
منسأل بعمر الكون نحنا مين
