بقلم : سناء سراج
انت مسافر.. ترجع بالسلامة
بس وحياتك ياغالي وانت جاي
هاتلنا شوية أمان
على حب وحنان
ولو لاقيت في سكتك راحة بال
هات كمان ..
وياريت تجيب معاك
حاجه تشفي الجراح
و تحسسنا كمان بالأمان
واي حاجة تمسح دمعنا
وتزيل همنا وترجعلنا
الزمان والعمر اللي كان ..
ايام كان القلب طيب
والنفس راضية
والعيشة حلوة هنية
وياريت كمان
لو تقدر تجيب الطيبين
اللي باقين يواسونا
ويعوضنا عن الراحلين
يمكن نلاقي فيهم
ايد تمسح دموعنا
وتطبطب على قلوبنا
نحكي معاهم من غير خوف
وهات وهات …
ولا اقولك كفاية كدة
لنكون (تإِلنا) عليك.