شعر: صباح غريب
زيّ النّهارده كده كنتي انتي متأكده
إنّي حاقوم م النوم وأقرالك الفنجان
واطلع بأحلامي
كام سلّمه لقدام واسرح بأفكاري
في بكرة حيجيلك
متخبّي في ملاسك
بيحطّ فوق راسك
تاج نور من الأحلام
زي النهاردة كدا كنتي انتي متأكده
أنّي حاقوم م النوم اقرا في جرانيلك
وأقرا عناوينك
أيه آخر الأخبار ؟
أصلي بعيد محتار
بين حلم مرسوملي
وحقيقة فيه بتنهار
وأنا
وأنا يا امّه حبيتك
واقف قصاد بيتك
زارع في ميه ورد
وساقيها بالأزهار
ماهو الميزان مقلوب
حتي في خط النار
زي النهارده كدا كان الأمل راقد
يحلم بنور بكرة
ياخسارة حلم وطال
والليل ماجاله نهار..