شعر: جون كرم
لما بيغفى الليل بيطل الصباح
وشمس الدجى بتلُبس الأرض الوشاح
ونحنا البشر بيزيد يوم بعمرنا
بمنبه الأعمار يعني يوم راح
هيدي الحقيقة بعمرنا وبقدرنا
ما في لِنا بأعمارنا فترة سماح
منتلقف سهام الحقيقة بصدرنا
وقبل ما دكتورنا يلاقي العلاج
منرحل وبعدو الجسم مثخن بالجراح
عا جناح شعري يا بلاغة حلّقي
بغيمة سمايي بيوت شعري علِقي
وقولي الحقيقة الساطعة لكل البشر
ولا تكذبي وتراوغي وتتملقي
قوليلهم جينا سوا برحلة سفر
وقوليلهم فحو الكلام المنطقي
تلتين عمري راح بحساب القدر
ولما القدر يعمل إلي جردة حساب
من تلت تالت مش مأكد شو بقي
رحت عا جنة ملاني بالورود
بقلب كل وردة شفت حب ووعود
وشفت حورية عا جنبي بالسما
مزخرف جمال خدودها بعيون سود
وشفت سحر الرب بالقامة نما
وطهر وسلام بلا وصاية ولا قيود
قلت يا ربي على ديار الحمى
لا ترجعني أنا ما بريد عود
يمكن أنا شارد بحلمي إنما
بالحلم لو لحظة سعادة بعيشها
بتسوى البداية والنهاية والوجود