شعر: جون كرم
على بيتي رجعت عند العشية
السما كانت بلا غيوم ونقية
قعدت عا كرستي مزمز بكاسي
وإتغزّل بالنجوم العلية
شفت نجمة عليها تاج ماسي
يمكن بالعمر بعدا صبية
بجمال العندها أخدت حواسي
وما بعرف وقتها شو صار فيي
وعلى مخدة همومي تكيت راسي
ورحت إحلم بدنيا سرمدية
وطرت بجوانحي فوق الرواسي
على مطارح ما بعرف وين هيي
ردت إنسى المآسي والتعاسي
بدني قسيت على غيري وعليي
وصرت حالي لحالي عم بواسي
وإلا بشوف عا قبالي حورية
نسيت الفقر ونسيت المآسي
وإبن آدم وشرو والأذية
وما بعرف كيف حالي صرت ناسي
عبطتني وكانت مستحية
قلت ربي ما فيك تكون قاسي
إذا مع هالبنت زغزلت نية
حوا وآدم بجرأة وحماسي
الخطية الأولية جربوها
والجنة العلية دشروها
وإذا حوا قدرتوا تعذروها
إعذروا آدم جنابي عالخطية
