شعر: صباح غريب
ياللي الكلام لعبتك
صيد القلوب غيّة
كسر القلوب حرفتك
والقصد ف النيّة
حتّي بنات حتتك
ف الدّور معديّة
ربّك كبير
كدبتك متسجّلة أهيّة
بكره تموت شكوتك
عطشان لحنيّة
بقيت فاضي
بقيت فاضي
بقيت جوّا القلوب ذكرى
بقيت راضي
عن الدّنيا اللي مش فاكرة
بقيت ماضي
وعايش ينتظر بكرة
بقيت عادي
تموت جوّايا ميت فكرة
بقيت إنسان
يلوّن بالرّتوش أشجان
ويرسم ضحكة ف الأحزان
ويستقوى بأمل بكره
بقيت فنان
بقيت فنان
