شعر: صباح غريب
غلطان أنا ويّاك
وحتعمل أيه فيّا ؟
ما أنا اللي كنت فهواك
بالقلب والنيّة
والنيّة فاكرة إنّها فى القلب محميّة
غلطان أنا ويّاك
طوّلت فى سنيني
والودن عارفة لغاك
مش سامعة لأنيني
غلطان أنا ويّاك
ويا ريت كمان عاجب
أنا اللي شفت ف هواك
العين على الحاجب
غلطان أنا ويّاك
ضيّعت فيك عمري
لا فهمت مرّة لُغاك
ما فهمت أنا أمري
غلطان انا ويّاك
وحتعمل أيه ياسيدي
والدمع تاه فى هواك
و النبض فى وريدي
غلطان أنا ويّاك
ملّكت لك أمري
والحُكم اهو ويّاك
من فوق سنين عمري
والحُكم حِكمة وتاج
للي يجود بيها
وأيه تكون رؤياك ؟
لما تعاديها
ماهى أيّ حكمة تكون للي يضاهيها
لمّا يميل الميزان
خصم وحكم فيها
غلطان أنا ويّاك
وحتعمل أيه فيّا
أنا اللي كنت ف هواك
بالقلب والنيّة