شعر: صباح غريب
بسّ كان الليل دليل
والهوا نسمه عليل
والسّما لونها جميل
والقمر يضوي بضيّه
زيّ خيط السّلسبيل
جيّ صوت الناي يلحّن
ألف ليل
كنت وحدي ف الحكايا
بسّ كان طيفك معايا
غمّضت عيني شوية
التقيتك وانتي جايا
بدر بينوّر سمايا
بدر بينوّر خطايا
بدر بينوّر حياتى
لألف ليل
لمّا مدّيت ايدي ليكي
بالسّلام
التقيت أنّك كلام
التقيت أنّك حروفي
وأن بدرك ده فى طيفي
يومها لُمّت كتير أيديا
لمّا جت تلمس إيديكي
حتّى لُمت كمان عينيا
لمّا جت تحضن عينيكي
اكتشفت أنّك سراب
اختفي بين الرموش
كنت مفتكرك معايا
بسّ ياخسارة هوايا
وقتها كان النّهاية