شعر: جون كرم
ومشيت عا درب الما إلها حدود
فتش عا روحي الهاربة مِني
متل الصبي الكان بحِلم موعود
والحلم ضاع وبقيت العنِي
وعالدرب في شوك وعشب وورود
وراعي مع القطعان بيغني
وأوركسترا بتعزف بعرس وجود
وناس جايي بعضها تهني
عصافير بتزقزق على الأغصان
بحلن سمفونية الأقدار
وحسون عم بيدوزن الألحان
كلمات جبران ولحن موزار
طل الربيع ورحّب بنيسان
من بعد ما ودّع شهر آذار
وقالت فصول العمر يا إنسان
فيق الحياة بهالعمر مشوار
الدرب اللي فيها نزول فيها طلوع
في ناس سِكر عمرها مرمر
وفي ناس عم تسكر بخمر الجوع
وناس عا خمر الغِنا بتسكر
بعيدي أنا بعيّد مع الموجوع
بعِد السنين بعود إتذكر
ما همني يضّوا بعيدي شموع
وكيف بفرح في نهاية عام
وكل عام عام بعمرنا منخسر