شعر: صباح غريب
وهاتلي اسم غير اسمي
وهاتلي رسم غير رسمي
وهاتلي شكل غير شكلي
وماتكترش فى مشاكلي
وهاتلي من الزّمن وقتي
وهاتلي من السنين عمري
وهاتلي من الحياة ذكرى
بتحييني متقتلنيش
وهاتلي فى الطّريق زادي
يكفّي كلّ أعيادي
وهاتلي من الأمل بكرة
يفرّحني مايصدمنيش
وهاتلي كمان طريق للبرّ
يوصّلني و ما يفوتنيش
وهاتلي نسمة فرحانة
وهاتلي ضحكة سهرانة
توديني وماتجبنيش
وهاتلي من النّجوم فرحة
وهاتلي من السّما طرحة
تغطّيني ماتكشفنيش
وهاتلي نهار ملوش آخر
وطول لِيلُه مايشغلنيش
وهاتلي حكاية وردية
وقصة حبّ منسيّة
وتاني أعيش
وأقول إن الزّمان جاني
وأنّه بفرحه هنّانى
هنا الدّراويش