شعر: صباح غريب
طريقي ماداس عليه قبلك
لاطير ولا جان
برمش العين فرشتولك وعديتك
و حضن أيديا من غيرك
ما داق سلامات
ولا حضّرت ع الفاضي
مرار القهوة م السكر
ولا بتمشى اتسكّر
ولا رمش الحنين صابني
ولا جابني لغير أرضك
ولا فرضي حيتقضّى
ونن عيوني مااتوضى
بنور عينك
ولا فتوى بغير الحبّ راح تشفع
خلاص طمّن بقى الإحساس
وعدي فوق قلوب الناس
دا قطر حياتي اتفضّى
وشد رحال وليك عدى
أنا جايه بشوق ونّاس
بلاش تنزل ملاكي الارض
