شعر: صباح غريب
ليه مرسوم
بالريشة الكلام والألوان ؟!
لكنّه بان بهتان
كلمة ورا كلمة
جايّة تقول أوهام
تعبان بيتلوى
لا روحه بترفرف
ولا قلبه كان ولهان
ليه الكلام مرسوم
بالحرف ع الشفّة ؟
مليانة بالألوان
معجونة بالخفّة
كلمة ورا كلمة
تتلون الرسمة
واللوحة مش بتبان
ليه الكلام مرسوم
قدّامي ع النوتة ؟!
كلمة ورا كلمة
بتغنّي حدّوتة
وكلام بيترقّص
والخطوة مظبوطة
والتون علي السيكا
لا قلبي حس غرام
ولا داب مع الألحان
ليه الكلام مرسوم
بعجينة من سُكّر ؟
معجونة بالخفة
متلوّنة باخضر
والورد كان احمر
لمّا تدوق حتبان
منظر علي الفاضي
والكدر كان …بهتان
ليه الكلام مرسوم
والرسم ع الفاضي ؟
خلّي الكلام بيدور
دايما ف إحساسك
خلّي الكلام أحكام
والقلب كان قاضي