شعر: صباح غريب
غدرتي وكنتي ملاكي
وهنتي على قلب عايش بيحلم بقربك
بيحلم يضمّك
بيحلم يقولّك :
خديني في حضنك
خديني
سنيني ماعادت تجيني في بعدك
خديني
داعقرب ثواني زماني
وقف لك تحيّة
حلفلك مايقدر يعيش إلا جنّبك
وجيتلك
وجيتلك وشايل في قلبي أماني
وفرحة زماني بعيني تضمّك
تقولّك : بحبّك
تقولّك : عشقتك
وصورة في قلبي رسمها خيالي
نقشها كلامك
وهمسك وبسمك
وضحكة لطفلة رنينها يجلجل
تقولّي : بحبّك
تقولّي : عشقتك
وجيتلك أقولك
حقيقي صبرتي
على قلب عاصي
على قلب قاسي
علي قلب رافض
يقولك : بحبك
على قلب ناسي سنينه
وعايش وميت في حضنك
وتاني
وهبتي لقلبي حياة
بقبلة نجاة
منحتي بقربك شهيق الحياة
وجاني بينبض
أخدني
وجابني لعندك
وأصبحت
بعشق هواكي
ونظرة رضاكي
وضمّة وشمّة لحلمك
عشقتك في بعدك
عشقتك في قربك
ورغم المسافة
عشقتك في حلمك
وجيتلك
وجايب لقلبك هدية
حبيبتي دا قلبي
تشيله أيديّا
وجيتلك وطاير
لقلبي وشايل
غدرتي وخنتي
قتلتي حياتي
دبحتي بأيدك
فؤادي اللي حبّك
رجعت وطريقي بيبكي عليّا
أنا كنت بحلم
تكون دي الحقيقة شفتها عينيّا
كرات دمّ حمرا وبيضا وصفايح
دا دمّي اللي سايح
دا كدبك وغدرك
دليل فيه إدانتك
سيبيه يجري
يمكن يطهّر خيانتك
ويمحي وجودك
ويغسل وريدي
وروحي ياخاينة
وإياك تعودي
ولا تسكني يوم
في قلبي ووريدي