شعر: صباح غريب
حكم القدر
في دودة جوّا الشّرنقة
تغزل لنا الخيط الحرير
بعدين تطير
حكم القدر
يمشي كمان فوق البشر
مين اللي باع ؟
مين انغدر؟
مين اللي تاه وسط البشر؟
حكم القدر مش حكمنا
ولّا قرار يلبق لنا
ولّا دا كان من حقنا
دا حكم أقوي م البشر
حكم القدر حكم السّنين
والكلمتين متجمّعين
فوق الصّدور
زيّ الحجر
حكم القدر دا ذنبنا
واللي جنيناه ف عمرنا
في ربّ أقوي م البشر
في ربّ دام يغفر لنا
في رب ولكلّ البشر
حكم القدر
في دودة جوّا الشّرنقة
تغزل لنا الخيط الحرير
بعدين تطير