شعر: صباح غريب
ودي أول خطاوينا ف
طريق الخير
وشكرا للي نبهنا
ودق اجراس تصحي الروح
تشد القلب ناحية رب
تلبس روحنا توب أبيض
طريق التوبة بينادي
فطهّر م الهوى قلبك
وأغسل بالدموع الذنب
وحق العبد
لو رابطه في حصالتك
تفك رباطه يرجع له
وترجع تاني روح صافيه
كما الافراخ في عش الطير
فليه تسكن ف حضن الخوف ؟
ومين فينا مسك ف اليوم
وشد كفوف
فوقّف للزمن عجله
ورجع يومه من تاني
عشان يمسح دموع العين
ف فك قيود
حواجز عمرك الماضي
وليه تعطل طريق الخير؟
وليه تقلق على بكره
وعلمه ساكن الملكوت
ومين راكب سفينة نوح ؟
ومين حيروح مع الطوفان ؟
فهات عقلك يعيش اليوم
كفاية هموم
مادام ليك رب