شعر: صباح غريب
وسط الكراكيب المرمية
وف ضلمة روح
أنا شفت القلب اللي بعته في جواب مفتوح
مدّيت أيدي لجل أسلم
دوّر وشه الجنب التاني وقال : لأ …. روح
ودموع عينه فرشت أرض الغرفة وعدت تحت الباب
بل حيطان الغرفة بدمعه
وقالي بدهشة:
ليه خليتني أبات مجروح ؟!
جرح القلب بينزف ااااااه
صوتها بينزل يكوي الروح
ليه دا أنا فاكرأني حبيبها ؟
وقلبي معاها فين ماتروح
ولقيت روحي فاتحة كتاب
صفحة كام حاجة وتسعين!
مكتوب فيها : إنّ القلب الطيب داب
بكرة حيجي يسلّم نفسه علي الأبواب
صفحة كام حاجة وتسعين
صورة لقلبي ومكتوب فيها
حُطّه جوّا مع الكراكيب
واكتب رقم الصفحة عليه
حط عليه ختم الاحباب