شعر: صباح غريب
قلب تاني للإيجار
مرة قلبي عاش في واحد
يومها كان الجوّ نار
كنت فرحانة إنّه بارد
كان في عينه الانبهار
قلبي أصله كان صغار
فى البداية كنت فاكرة
إن بَرْدُه دا جدار
بسّ يا خسارة المشاعر
كانت أبرد م الجدار
يومها حسّيت إنّي عارفة
إنّي خايفة م المواجهة
والمرار
مرّة يفرح مرّة يجرج
مرّة يعند باقتدار
مرّة يهدى
مرّة يرضى
مرّة يلعن دا القرار
مرّة يقدر حتّى يكسر
جوّا منّي الانكسار
والزمن جوايا حاكم
والزمن جوايا نار
كان ضروري إنّى أبعد
هو دا كان القرار
كان قراري …. انفجار
يومها كانت حرب ساحقة
جوّا ساحة م الدّمار
كان قراري … اختيار
عارفة إنّى خسرت عمري جوّا عتمة الانتظار
إنى أكسب بسّ قلبى
ويّا روحي واللي باقي
من سنيني دا انتصار
أنت جاي تاني تقولي :
قلب جاهز للإيجار؟
أنه قلب للإيجار؟!
يوم ما تلقي معاك خليلك
وبأمانُه راح يجيلك
أديهوله هدية منّك
وقتها يصونك كإنّك
حتّة منّه حتّة منّك
والهوى سلطان قرار
قلب ملكي مش إيجار
خلّى فى قلوبنا العمار