شعر: صباح غريب
قلب تاني للأيجار
مرّة قلبي عاش في واحد
يومها كان الجوّ نار
كنت فرحانة انّه بارد
كان في عينه الأنبهار
قلبي أصله كان صغار
في البداية كنت فاكرة
إن برده دا جدار
بس ياخسارة المشاعر
كانت أبرد م الجدار
يومها حسيت أنى عارفة
أني خايفة م المواجهة والمرار
مرّة يفرح .. مرّة يجرج
مرّة يعند باقتدار
مرّة يهدي.. مرّة يرضي
مرّة يلعن دا القرار
مرّه يقدر حتى يكسر
جوا مني الأنكسار
والزمن جوايا حاكم
والزمن جوايا نار
كان ضرورى أنى أبعد
هو دا كان القرار
كان قراري : أنفجار
يومها كان حرب ساحقة
جوا ساحة م الدمار
كان قراري أختيار
عارفة انى خسرت عمرى جوا
عتمة الانتظار
إني أكسب بس قلبى
ويّاروحي واللى باقي
من سنينى دا انتصار
أنت جاى تانى تقولي:
قلب جاهز للإيجار؟
أنه قلب للإيجار؟!
يوم ما تلقي معاك خليلك
وبأمانه راح يجيلك
أديهوله هدية منك
وقتها يصونك كإنّك
حتّة منه حتّة منك
والهوى سلطان قرار
قلب ملكي مش إيجار
خلي فى قلوبنا العمار