شعر: جون كرم
لازم مواقفنا نقولا بالعلن
من حيث صرنا بوضع أعفن من عفن
لبنان قالوا سويسرا هالشرق كان
واليوم مصنع للحروب وللِفتن
لا إسرائيل بتريدنا نعيش بأمان
وفي ناس من شعبو لغيرو مرتهن
باعوا الجنوب لفلسطيني من زمان
ومع سوريا وجيشها دفعنا الثمن
وإيران عا أذرع لها وضعت رهان
ومن وقت ثورتها عم نعيش المِحن
لا بدنا لا إسرائيل ولا إيران
نحنا شعب واحد مخايل أو حسن
بيكفي بقا ذل ورهان وإرتهان
ولما لوطن تاني بيكون الإنتماء
وناس لا عِرفت ولا بتعرف ولاء
قاسية بتكون محكمة الزمن
وما بدنا يقولولنا خسرتو وطن
