بقلم: جان كرم
بالبدء قالوا في حقيقة وفي خيال
وفي خلود وفي بقاء وفي زوال
وفي آدم وحوا وبداية للوجود
والرب كوّن هالدني سهول وجبال
الأديان قالوا الموت آخرتو خلود
ووحدو إله الكون في عندو كمال
وأديان من هندوس بوديسم ويهود
وإسلام ونصارى مع صليب وهلال
بس العلم بيأكد وعندو شهود
أنو أساس الكون جايي من المحال
وبيقلك الإنسان أجدادو قرود
وعا رأيهم لا في نقاش ولا جدال
لولا تطلعنا على جبال وجرود
وعا طبيعة عم بتزهر بالجمال
وعا كون ساير من ألافات العقود
وعا مجّرة وعالنجوم بكل حال
بكل دقة كل نجم عندو حدود
وكل كائن في إلو دور ومجال
يعني الخلق هالكون من عقم الجمود
بدقة وتروي مش بسرعة وإرتجال
وناس بتجي وبتروح وبتمرق عهود
وهيدا حرام بديننا وهيدا حلال
مين قال إنو الشوك مش بي الورود
ومن قال إنو السهل مش إبن التلال
يعني الدني ملايين عام من السنين
ناس عم تخلق وغيرن راحلين
كفار لو كنا وكنا مؤمنين
والشك لولا في يقين الناس طال
ولو متل توما الشككوا منن قلال
ما رح بيتغير يمين من الشمال
ورح بيبقى بعدنا ذات السؤال
هيك قال العلم هيك الدين قال