شعر: جون كرم
من بعد كم يومين هالقدّي
بعمري اللي هارب زادت المِدّي
يا حباب جان لفضلكم ممنون
وصعبي توصّل كلمتي الردّي
هالكون عمرو كم ألف مليون
ناس بتجي وغيرن عم يودّي
لو كنت مقرش أو كنت مديون
ذات النتيجة والأمر جدّي
العالم بيتصارع بحفل جنون
كرمال شو بدّك وشو بدّي
وحرب الوجود نكون أو ما نكون
هدّي إن كنَّك قادر تهدّي
بعيِّد أنا لما طفل محزون
بيغمض عيونو عالمخدي
بعيّد أنا لو طبقّوا القانون
وبالحبس حبسوا الظالم يمضّي
عيدي أنا الغصن بشجر زيتون
عيدي أنا زهرة عم تندّي
ولمّا بعيدي كلنا منكون
ولمّا بعيدي بشوفكم يا حباب
بِالروح يَمّا بالجسد حَدِّي
