لسّاك هنا ؟!

شعر: صباح غريب

لسّاك هنا ؟!
لسّاك هنا في نفس المكان ؟!
لسّاك مراقب خطوها زيّي زمان ؟!
لسّاها سابقة خطوها سابقة الزّمان ؟!
لسّاها حاسّة بين أيديك نفس الأمان ؟!
لسّاك هنا ؟!
لسّه الكلام نفس الكلام ؟
نفس الوعود والابتسام ؟
لسّاها عايشة ف الغرام ؟!
سارحة ف موال الهيام
فاكرة الحياة ويّاك تمام ؟!
لسّاك هنا ؟!
لسّاك بتمسك ودنها
قاعد تغني لقلبها
فوق الرّمال ترسملها
في حاجات كتيرولا في الخيال ؟
زيّ القصور اللي لخيالي رسمتها
ويّا الرّياح بعترتها
أحلام كتير ولا عشتها
لسّاك هنا ؟!
لسّاها هي مصدقاك ؟!
فاكرة إنّ فيه جوّاك ملاك ؟
فاكرة إنّها عايشة في حماك؟
أن السنين ضحكت لها
لما صادفها في يوم هواك ؟
لسّاها برضه مصدّقة ؟!
هيّ الوحيدة حرّكت من وسط كلّ الكون هواك ؟!
لسّاها فرحانة بلقاك ؟!
لسّاك هنا ؟!
كل الضّحايا قبلها عاشوا لغاك ؟!
كانوا تلاميذ في الهوى في حضرة هواك
ويّا الكلام الحلو دابوا ف قهوتك
وشربتها ؟!
سبت المرار ليهم وراك
من غير ما تسمع صوت أنين
أو تلتفت حتي لنداك
لسّاك هنا ؟!
أمتى تخاف من ربنا ؟!
بكرة حيسقيك المرار وحتشربه برضو ف سكات
كلّ القلوب اللي رميتها في يوم وراك
راح تلتئم تاني تعود
ويّا السّجود
راح تشتكي لله ف علاه
راح تبتهل لجل الخلاص من عار هواك
لسّاك هناك ؟!
فيه ربّ بيراقب خطاك