شعر: صباح غريب
مصرع حبيبتي أنا
رغم السنين واجع
فارقت عينيا المكان
وقلت مش راجع
أصل القتيل ساكن
جوّا حواشيه
والموت ماهوش للجسد
قد القلوب واجع
حاكتب علي بابه :
( ما فيش حبيب مضمون )
وادي الشّعار مرفوع
للندل فين مايكون
رغم الوجع في الفراق
ماديتلهاش بّصّة
دا البصّه من عيني
كان فيها كام قصة
من النهاردة خلاص
تحرم علي عيونها
والذكريات لو جت
ملعون أبو ظنونها
فايدة قلوبنا أيه
لو نبضها يوم مات ؟!
ونصَبنا حبل وداد
في مقبرة عشاق
نعزف دقيقة حداد
ممنوع علي قلبي
يمشي مع المجاريح
وما يدخلوش مخلوق
وان كان معاه تصريح
ممنوع علي قلبي
توهته مع التّايهين
لو حتّي راح تملك
مصباح علاء الدين
راح أفرشة رملة
أو خضرة في البساتين
وحقول في أوصافة
غايب بقاله سنين
واكتب علي بابه
مسموح لكل الخلق
إلّا البني آدمين !!