شعر: صباح غريب
مش ندمانة وطلّقني
ولو كان الكلام كلامين
وعدّيت الحدود شطّين
لو النّجمة بقت خطّين
أنا كارهة أعيش بهواك
تعيش أنتَ بهوى تاني
وأعيش بالجرح وأداري
وأقول : أصل العيال والبيت
وأربط جوّا منّا خيط
يتوه ويّايا ف الزّحمة
بدون رحمة
واعيش العمر أتألم
وأقول حبّيت
وأنام دمعي على خدّي
وأصحى أبصّ لولادي
وأقول : البيت
وأقول : العيلة واللمّة
وضاع العمر كلّه معاك
وعمري ما لقيت ضمّة
أنا وجعي على الآخر
أنا حلمي ماهوش فاخر
حلمت ببيت على قدّي
بنيت البيت عشان نرتاح
لكن أنت لقيتلك جوّا منّه براح
هجرت القلب هجرت الحبّ
وأهو مات الأمل في هواك
مادام قلبك لغيري مال
أنا رحّال
ومش ندمانة على عمري
اللي عدّا وراح
حاعيش سوّاح
ولولادي حاكون أفراح
أنا آسفة على صبري
على عمري اللي عدّا وراح
على عمري اللي كلّه جراح
أقولك : لا مانيش آسفة
أنا كنت الحمام ف البيت
أنا كنت لضنايا جناح