شعر: صباح غريب
فتحت باب الألم
الجرح وحداني
شدّيت إيدين الوجع
أفتح لي باب تانى
م الشدّ كتفي اتخلع
القفل من برَّه كان نفسي أكون حُرّه
أرَكَب حصان الحلم ياخدني بره الكون
الناس بقت أفيون بيغيّب الأخلاق
ويحضّر المجنون
وانا قلبي عاش مسجون
مادد صوان للحزن
والكل بيعزي
وانا ميتي مبدأ بالصدق كان معجون
والكل دافنينه وانا وحدي والمبدأ
قفلوا علينا الباب الناس بقت أغراب
وانا غربتي إحساس عايش في وجداني
مستني إيه تاني؟!
بشرب مرار الكاس
فارد بساط الندم ع الدنيا والأحلام
كان نفسي أمشي العكس
من عجلة الأيام
ألحق لي حفنة هنا وحتتين سكر
لكن دا كله سراب
الدنيا دى حاله
بيني وبينها خلاف
وانا عايشه تحت الأرض
من غير رباط أو شاش
