شعر: فريــد زمكحـل
ليه أحبَّك أنا … وتشُوفَكْ عيوني الكون
تنَام وأسهر أنا … أحايل في ليلي ظنون
تضحك ووحدي أنا … أعيش يا روحي شجون
أخلِص دايما أنا … وأنتَ حبيبي تخون
ليه أحبَّك أنا … وأتمنى أشُوفَك يوم
تغيب وأسهر أنا … عيني مجافيها النوم
ليه يا روحي أنا … وروحي وروحك توم
تنسى في بُعدك أنا … ووحدي أبات مهموم
ليه أحبَّك أنا … وتشُوفَك عيوني الكون
مخدوع بحبَّك أنا … وقلبي بطبعه حنون
تضحكْ دايما وأنا … أعيش يا روحي جنون
أخلص دايماً أنا … وأنتَ حبيبي تخون
عارف مين أنا … بس أنتَ مين تكون؟
ليه أسامحك أنا … وأنت غاوي تلوم
تبعد عني أنا … وعندي الحنان بالكوم
تنام وأسهر أنا … أعد يا روحي نجوم
ناسي مين أنا … وفاكرني حعيش محروم
وأقول لقلبي أنا … مين كان في يوم معصوم؟