شعر: جون كرم
مبارح أنا وماشي محيط الأطلسي
شفتو على جنبي علامو منكسي
وكانت دموعو عم تسبح عالرمال
والرمل بدموع المحيط مغمسي
سألتو شو صاير يا محيط بهالمجال
وليشك حزين بهالطبيعة المشمسي
بعلمي إنت واصل جنوبك بالشمال
وإسمك القوة والصلابة مأسسي
وصامد على مر الزمن متل الجبال
والباسفيكي والخليج الفارسي
بلسان موجو تنهد وتمتم وقال
مين يا إنسان أفعالك نسي
دنستني بأسطولك قطعت الوصال
أساطيل حربك عالشواطي ممترسي
شو عملتوا بالطبيعة والجمال
وبالحرب أشلاء الطفالى مكدّسي
الله عطاكم كون عاصي عالزوال
وأجمل طبيعة بالجمال مهندسي
الله خلق هالكون أقرب للكمال
ومن حرب أولى وتانية شو عم يصير
والكل عا سلاحو وعم يدق النفير
ومازال عكس السير نحنا عم نسير
ومازال فينا ما رح بيوعى الضمير
أرض القداسة رح بتبقى مدنسي
وشجرة بقانا رح بتبقى مسوسي
