شعر: صباح غريب
آخر سنين البرد
مرت عندها
زق الهوا
باب قلبها العريان
ضحك المكان … وفتح أيديه
ملقاش دفا
صوت الرياح … طفا الشموع
بعتر كلام غنوة فريد
ويا كلام عبد الحليم
كان وسطهم
غنوه لسعاد
أترعشت الأوتار
فغنت جرحها
اللحن داب
فردت حبال الصوت
تنشر حلمها
حاولت تدفي
بين أيديها قلبها
عدا الهوا …..
البرد طال …. كل المكان
شدت ليالي الحب
غطت جرحها
السهم صاب … نفس المكان
السهد غير
لون عينيها الطيبين
والصبر سرسب
من أيديها العطشانين …
زاد الأنين
لا السعي مكتوب لك
ولا كنتي ف يوم هاجر
ولا ابن قلبك كان نبي
فجر حجر صوان
البرد طالك من زمان
ردي البيبان
رديّ البيبان
