يا موطني

شعر: جون كرم

يا ما دول وبلاد زرت بهالدني
وبهالدني حظي بغربة زتني
وما بين شرق وغرب وجنوب وشمال
عالسفر صارت حياتي مدمني
حيث فينا العمر سفرة بكل حال
وحيث القلق كل يوم عم بيهزني
وحتى بعمري إستفيد بهالمجال
ولوين مشوار الطبيعة شدني
عا موطني لبنان شديت الرحال
وشفت الوطن قديش تاريخو غني
وبضيعتي شفت الأخوة بالعيال
وساحة الضيعة والجرس والمطحني
وملتقى الوديان وشموخ الجبال
والكنيسة والرعايا المؤمني
وعمر الصرفتو بغربتي والهجر طال
بعيد عنك كل سني أخسر سني
تأكدت أنو بهالدني المتلك قلال
وعمرك وقت ما ربنا الدنيا بني
وبمسابقة حسن الضيافة والجمال
وبمسابقة تاريخ كل الأزمني
وبمسابقة رب الخليقة والكمال
قللي الخلق هالكون من ماضي الزمان
يا جان لبنان النجح بالامتحان
تربع على عرش المكانة والمكان
وقللي تا قلك بالوفا والعنفوان
إنت الدني كل الدني يا موطني