شعر: صباح غريب
بتلف حروفي الأرض مشاع
يتشعلق حرفي علي الجدران
يعمل شباك الكلمة شراع
يتعلق فوق مركب قلبي
ويعدي البحر السابع
من جوا بحور الشعر
يسكن مع أي سكون في الحرف
من تاني يقوم مع حركتها
تتشيد في الحال أبياتي
تسكنها عينيها الحلوة براح
تفتح أبواب القلب الصامد من غير مفتاح
وبكلمة من عينها الحلوة
يتحول عمري لأفراح
تتجول في حارات من شعري
ماهو شعري مدينة بتملكها
بتحرّكها
وبتسكنها علي دقة قلب
بحور الشعر ومراكبها
لو يرسي الحرف في مراسيها
يغرق في شجنها ولياليها
ماهو عشقي
قصيدة في حضرتها الدنيا براح