شعر: صباح غريب
وقوليلي: ليه ؟
ليه تسكتي ؟
ليه تكسري فيكي القلم ؟
وتقولي مين فيكي اتصدم ؟
ولا يوم ندم
وتكلّميني عن الكرامة
واللي بيحبّ بشهامة
واللي بيضحي بقيامة
واللي متّخبي فعتامة
واللي كان شايل سهامة
واللي بيصبّح ولو ويّاه جنيه
يقسمه بينك وبينه
طب وليه؟
ليه تسكتي ؟
ليه تحولي ولادك رعاع؟
دول اللي ليهم
ألف باع
دول اللي يبنوا فى الخلا
ليكي القلاع
ويعمروكي لو عليهم
يوم ناديتي
وف أجرهم ما يوم يعِدّوا
لو يوم عطيتي
ليه تسكتي
لمّا بييجوا ع الغلابة
بالضريبة والأتاوة
لكن اديِكي بتسكتي
ويّا السّباع
طب ليه تسيبيهم ينهشوا
فيكي القلاع
أوليه تسيبيهم يحصدوا
كلّ الفلاح
هو أنتى ليه قاسية كده
بتفرّقينا؟؟
ليه بترضيلنا الهوان
والخوف مالينا؟
وسباعك الغادرة
بتنهش عرضنا
وتدوس طهارة أرضنا
بقي دول يا أمي صحيح
ولادك زيّنا ؟ّ!
وأنا مين قوليلي أكونش
جيّ من السّفاح ؟ّ
دا أنا اللي بحميلك فى عرضك
ليل نهار
أنا اللي مادقتش
حلاوة الانتصار
وهو عايش ما ذكر
يمدّ إيده بالطّمع
ياخد وعمره ما شكر
ليه تسكتي ؟
ليه تكسري
فيكي القلم؟
وأنا اللي بكتب
فوق ثيابك مش باسطّر ع الورق
وأنا اللي بكتب
ع الضلوع
مش بس بكتب ع الورق
كان المداد يا أمى
حبّه دمّ
ليه تكسرى قلمي
واعيش ويّا النّدم؟؟