شعر: جون كرم
طلعت إتمشى بقلب غابي
عا درب بالدعسات محفورة
وإكتب قصيدة شعر بكتابي
بختمة خريف العمر ممهورة
الأشجار وبألوان جذابي
متل بنت كتير قمورة
أخضر ورقها صار عنابي
هرهر وهيي كتير مقهورة
وعا تلال شلالات منسابي
بتسرح بوادي بتنزل بجورة
وتا أوصف اللي شفت يا حبابي
بكتب من الأشعار أسطورة
عتّم الليل وطوّل غيابي
قلت شو حلوه يا معمورة
وسكرت عالسّحر الحلو بابي
وبقيت بعيني نايمي الصورة