شعر : جون كرم
بسألك ربي أنا من وين؟
خلقتني قللي لوين رايح
لما فتحت عا هالدني العينين
كنت بحلاها شارد وسارح
صرلي أنا بهالكون من يومين
متل الغريب بأرضها سايح
كل يوم بيراكم علينا دين
وبدل ما يغني الدني الإنسان
صار بكرا يشبه مبارح
ورفرفوا جناحي بهالغابات
عم فتش عل حدود معمورة
وفجأة جناحي سابقوا الغيمات
شفت غيمي كتير مقهورة
ضميتها لصدري أنا بالذات
عصفور يمكن حب عصفورة
وفجأة فقت والحلم فيي مات
فتحت عيني الحلم ضلو حلم
وبقيت وحدي عابط الصورة
وينك يا حورية أمل هربان
ليش عم شوفك بأحلامي
مرقتي بأحلامي وأنا غفيان
وليش ما قبلتي معي تنامي
عايش غريب معذب وهربان
بتسكر على الأوجاع آلامي
ورغم الوجع من كتر حبو جان
حرامي على جسمي المعذب شلت
حتى يغطي جسمك حرامي
الحبيتهم واحد ورا التاني
من هالدني لتاني دني راحوا
وحتى يعزوني بأحزاني
يا جان قالوا حبابك إرتاحوا
شو هالدني أسرار ملياني
وكون نحنا بس سياحوا
وطير الصدح ألحان وغناني
متلنا ما كمل المشوار
تقوص قبل ما ريشوا جناحوا