بقلم: جون كرم
بجوانحي طرت بسما الغيمات
بجو الفضا بطرقات مهجورة
شفت نجمة تغازل النجمات
كتير حلوة كتير قمورة
وكون ودني وجنات حوريات
ونور الشمس بديار معمورة
وشب وصبية تنين حد تنين
عم بيتمشوا عا درب العين
بسألك ربي أنا من وين
لما على عيوني يطل الضو
ولما جناحي تلتحم بالجو
ولما بتقوي بالبحور النو
وما بين كلمات الندم واللو
وحزن وفرح عم يجمع الحدَين
برحلة عمر ما بين بين وبين
بسألك ربي أنا من وين
ولما بعمري بتنبت الآهات
ولما بكاسي بتسكر السكرات
ولما بعرسي بتصدح الآهات
ولما بترهن كل عمرك دين
ولما بيحبسنا بسجنو البين
بسألك ربي أنا من وين
ولما العمر بيريش جناحو
ولما الكبر بيلون وشاحو
ولما الجرح عم تنزف جراحو
مع ناس كانوا حدنا وراحوا
وحسرات تكرج متل دمع العين
غياب ولِقا قسمو العمر نصين
بسألك ربي أنا من وين
ولما بطيارة بسما الغيوم
بتطلع بتنزل بالغيوم تعوم
وجوعان عن لقمة خبز بيصوم
بعصر الغنى في معتر ومحروم
أين العدالة يا إلهي أين
وكيف بتقاوم المخرز عين
بسألك ربي أنا من وين